ਪਹਿਲਵਾਨਾਂ ਵੱਲੋਂ ਅੰਦੋਲਨ ਨੂੰ ਆਲਮੀ ਮੰਚ ’ਤੇ ਲਿਜਾਣ ਦੀ ਤਿਆਰੀ

ਪਹਿਲਵਾਨ ਜਿਨਸੀ ਸ਼ੋਸ਼ਣ ਮਾਮਲੇ ਵਿੱਚ ਬ੍ਰਿਜ ਭੂਸ਼ਣ ਨੂੰ ਗ੍ਰਿਫ਼ਤਾਰ ਕੀਤੇ ਜਾਣ ਦੀ ਮੰਗ ’ਤੇ ਬਜ਼ਿੱਦ ਹਨ। ਚੇਤੇ ਰਹੇ ਕਿ ਇਕ ਨਾਬਾਲਗ ਸਣੇ ਸੱਤ ਮਹਿਲਾ ਪਹਿਲਵਾਨਾਂ ਨੇ ਸਿੰਘ ’ਤੇ ਜਿਨਸੀ ਸ਼ੋਸ਼ਣ ਦੇ ਦੋਸ਼ ਲਾਏ ਸਨ। ਵਿਨੇਸ਼ ਫੋਗਾਟ ਨੇ ਕਿਹਾ, ‘‘ਅਸੀਂ ਆਪਣੇ ਪ੍ਰਦਰਸ਼ਨ ਨੂੰ ਆਲਮੀ ਮੰਚ ’ਤੇ ਲਿਜਾਵਾਂਗੇ। ਅਸੀਂ ਹੋਰਨਾਂ ਮੁਲਕਾਂ ਦੇ ਓਲੰਪੀਅਨਾਂ ਤੇ ਓਲੰਪਿਕ ਤਗ਼ਮਾ ਜੇਤੂਆਂ ਤੱਕ ਪਹੁੰਚ ਕਰਾਂਗੇ। ਅਸੀਂ ਉਨ੍ਹਾਂ ਦੀ ਹਮਾਇਤ ਲਈ ਉਨ੍ਹਾਂ ਨੂੰ ਪੱਤਰ ਵੀ ਲਿਖਾਂਗੇ।’’ ਮਹਿਲਾ ਪਹਿਲਵਾਨ ਨੇ ਦਾਅਵਾ ਕੀਤਾ ਕਿ ਕੁਝ ਅਨਸਰਾਂ ਨੇ ਐਤਵਾਰ ਰਾਤ ਉਨ੍ਹਾਂ ਦੇ ਧਰਨੇ ਨੂੰ ਦਾਗ਼ਦਾਰ ਕਰਨ ਦੀ ਕੋਸ਼ਿਸ਼ ਕੀਤੀ। ਫੋਗਾਟ ਨੇ ਦਾਅਵਾ ਕੀਤਾ ਕਿ ਧਰਨੇ ਵਾਲੀ ਥਾਂ ਪਹਿਲਵਾਨਾਂ ਦਾ ਪਿੱਛਾ ਕੀਤਾ ਜਾ ਰਿਹੈ। ਪਹਿਲਵਾਨ ਨੇ ਕਿਹਾ, ‘‘ਕੁਝ ਲੋਕਾਂ ਨੇ ਸਾਡੇ ਧਰਨੇ ’ਚ ਅੜਿੱਕੇ ਡਾਹੁਣ ਦੀ ਕੋਸ਼ਿਸ਼ ਕੀਤੀ। ਪਿਛਲੀ ਵਾਰ ਪ੍ਰਦਰਸ਼ਨ ਵਾਲੀ ਥਾਂ ਸੌਣ ਵਾਲੇ ਮੰਜੇ ਲਿਆਉਣ ਮੌਕੇ ਵੀ ਇਹੀ ਕੁਝ ਹੋਇਆ ਸੀ।’’ ਵਿਨੇਸ਼ ਨੇ ਕਿਹਾ, ‘‘ਸਾਡਾ ਪਿੱਛਾ ਕੀਤਾ ਜਾ ਰਿਹੈ। ਲੋਕ ਰਿਕਾਰਡਿੰਗ ਕਰ ਰਹੇ ਹਨ…ਤਸਵੀਰਾਂ ਖਿੱਚੀਆਂ ਜਾ ਰਹੀਆਂ ਹਨ…ਅਤੇ ਜਦੋਂ ਅਸੀਂ ਉਨ੍ਹਾਂ ਨੂੰ ਰੋਕਦੇ ਹਾਂ, ਉਹ ਸੁਣਦੇ ਨਹੀਂ। ਕੁਝ ਅਣਪਛਾਤੇ ਲੋਕ (ਮਹਿਲਾਵਾਂ) ਪਹਿਲਵਾਨਾਂ ਵੱਲੋਂ ਲਾੲੇ ਟੈੱਟਾਂ ਵਿੱਚ ਸੌਣ ਦੀਆਂ ਕੋਸ਼ਿਸ਼ਾਂ ਕਰ ਰਹੀਆਂ ਹਨ।’’ ਉਸ ਨੇ ਕਿਹਾ, ‘‘ਮਹਿਲਾਵਾਂ, ਜਿਨ੍ਹਾਂ ਨੂੰ ਅਸੀਂ ਜਾਣਦੇ ਨਹੀਂ…ਨੂੰ ਟੈਂਟਾਂ ਦੇ ਅੰਦਰ ਭੇਜਿਆ ਜਾ ਰਿਹੈ…ਅਜਿਹੀਆਂ ਚੀਜ਼ਾਂ ਹੋ ਰਹੀਆਂ ਹਨ, ਜੋ ਅਸੀਂ ਨਹੀਂ ਚਾਹੁੰਦੇ ਕਿ ਧਰਨੇ ਵਾਲੀ ਥਾਂ ਹੋਣ…ਇਸ ਨਾਲ ਸੱਚਾਈ ਤੇ ਨਿਆਂ ਖਿਲਾਫ਼ ਸਾਡੀ ਲੜਾਈ ਬਦਨਾਮ ਹੋਵੇਗੀ।’’

ਵਿਨੇਸ਼ ਫੋਗਾਟ ਨੇ ਕਿਹਾ ਕਿ ਉਹ ਖੁ਼ਦ ਨੂੰ ਧਰਨੇ ਵਾਲੀ ਥਾਂ ਤੱਕ ਸੀਮਤ ਨਹੀਂ ਰੱਖਣਗੇ ਬਲਕਿ ਦੇਸ਼ ਦੇ ਹਰ ਨਾਗਰਿਕ ਨੂੰ ਉਨ੍ਹਾਂ ਦੀ ਹਾਲਤ ਬਾਰੇ ਜਾਣੂ ਕਰਵਾਇਆ ਜਾਵੇਗਾ। ਵਿਨੇਸ਼ ਨੇ ਕਿਹਾ, ‘‘ਅਸੀਂ ਹੁਣ ਹੋਰਨਾਂ ਥਾਵਾਂ ’ਤੇ ਜਾ ਕੇ ਪ੍ਰਦਰਸ਼ਨ ਕਰਾਂਗੇ, ਲੋਕਾਂ ਨੂੰ ਓਨਾ ਹੀ ਸਾਡੀ ਲੜਾਈ ਬਾਰੇ ਪਤਾ ਲੱਗੇਗਾ।’’-ਪੀਟੀਆਈ